अलिबाग : अलिबाग नगरपरिषद निवडणुकीत युतीच्या उमेदवारांचा विजय निश्चित असून, नगरपालिकेला विकास निधी कमी पडू देणार नाही, अशी ग्वाही राज्याचे उद्योगमंत्री उदय सामंत यांनी शनिवारी (दि.२२) अलिबाग तालुक्यातील थळ येथे दिली. शिवसेना (शिंदे गट), भाजप नगरपालिका युतीची आढावा बैठक उदय सामंत यांच्या उपस्थितीत पार पडली. यावेळी उदय सामंत यांनी उपस्थित युतीचे उमेदवार तसेच पदाधिकारी व कार्यकर्त्यांना मार्गदर्शन केले. 

अलिबाग नगरपरिषद निवडणुकीला युतीच्या उमेदवारांनी व कार्यकर्त्यांनी विश्वासाने सामोरे जावे. मी जे मत मागेन तेच मत माझ्या सहकारी उमेदवारासाठी व नगराध्यक्ष पदाच्या उमेदवारासाठी मागेन, या भावनेने काम केल्यास युतीचे उमेदवार‌ प्रचंड मताधिक्याने निवडून येतील, असा विश्वास उद्योगमंत्री उदय सामंत यांनी व्यक्त केला.

अलिबाग, कर्जत, रत्नागिरी अशा अनेक ठिकाणी भाजप, शिवसेना युती आहे. विकासाचे राजकारण करून अलिबागकरांची मने जिंकायची आहेत. नगरपरिषदेत युतीचा विजय झाल्यास नगरपालिकेला एकही रूपयाचा निधी कमी पडणार नाही हा शब्द उपमुख्यमंत्री व नगरविकास मंत्री एकनाथ शिंदे यांच्या वतीने मी देत असल्याची घोषणा, उदय सामंत यांनी यावेळी केली.

यावेळी आमदार महेंद्र दळवी, जिल्हा परिषदेचे माजी उपाध्यक्ष आस्वाद पाटील, माजी समाजकल्याण सभापती दिलीप भोईर, शिवसेना जिल्हाप्रमुख राजा केणी, भाजप महिला आघाडी जिल्हा संघटिका चित्रा पाटील, शिवसेना महिला आघाडी जिल्हा संघटिका संजीवनी नाईक, भाजप जिल्हा चिटणीस ॲड. महेश मोहिते, युतीच्या नगराध्यक्ष पदाच्या उमेदवार तनुजा पेरेकर यांच्यासह युतीचे सर्व उमेदवार, पदाधिकारी, कार्यकर्ते उपस्थित होते.