अलिबाग : जिल्हाधिकारी कार्यालयावर चार वर्षापूर्वी सौर ऊर्जा प्रकल्प कार्यान्वित करण्यात आला आहे. तसाच जिल्हा परिषदेवर ही सौर उर्जा प्रकल्प कार्यान्वित केला जाणार होता. मात्र जिल्हा परिषद इमारत पाडली जाणार असल्याने कुंटे बागेत जिल्हा आरोग्य विभागाच्या औषध भंडार इमारतीवर सौर ऊर्जा प्रकल्प बसविण्यात आला आहे. मात्र गेल्या दोन वर्षापासून हा प्रकल्प सुरूच झाला नसल्याने भरमसाठ बिलाचा भार जिल्हा परिषदेवर पडत आहे.
शासकीय कार्यालयात विजेचा वापर अधिक होत असतो. अनेकवेळा कर्मचारी नसतानाही पंखे, लाईट सुरू ठेवले जातात. त्यामुळे बिल भरमसाठ येत असते. यावर उपाय म्हणून सौर ऊर्जा प्रकल्प कार्यान्वित करण्याबाबत सूचना देण्यात आल्या होत्या. त्यानुसार जिल्ह्यात जिल्हाधिकारी आणि जिल्हा परिषद इमारतीवर सौर ऊर्जा प्रकल्प कार्यान्वित करण्याचे ठरले. तत्कालिन जिल्हाधिकारी निधी चौधरी यांनी पुढाकर घेऊन जिल्हाधिकारी कार्यालयावर सौर ऊर्जा प्रकल्प कार्यान्वित केला आहे.
जिल्हाधिकारी कार्यालयावर सौर ऊर्जा प्रकल्प कार्यान्वित केल्यानंतर वीज बिल शून्य झाले आहे. त्यामुळे प्रशासनाचे पैसे वाचले आहेत. जिल्हा परिषदेच्या शिवतीर्थ इमारतीवर सौर ऊर्जा प्रकल्प कार्यान्वीत केले जाणार होते. यासाठी सौर ट्यूब आणून ठेवले होते. मात्र शिवतीर्थ इमारत धोकादायक ठरविल्यामुळे ती पाडण्यात येणार आहे. त्यामुळे इमारत पूर्णतः खाली करण्यात आली आहे. इमारत खाली केल्याने सौर ऊर्जा प्रकल्पाचे साहित्य वापराविना पडले होते.
जिल्हा परिषदेचे कुंटे बागेत स्थलांतर झाल्यानंतर आरोग्य विभागाच्या औषध भंडार इमारतीवर सौर ऊर्जा प्रकल्प कार्यान्वित करण्याचे ठरले. त्यानुसार मेढा मार्फत ठेकेदार देऊन इमारतीवर सौर ऊर्जा प्रकल्प बसविण्यात आला आहे. मात्र गेली दोन वर्ष झाले तरी हा प्रकल्प सुरू करण्यात आलेला नाही आहे. इमारतीवर फक्त यंत्रणा टाकून ठेवली असल्याचे दिसून येते.
दोन वर्षापासून सौर ऊर्जा प्रकल्प सुरूच झाला नसल्याने औषध भंडार इमारतीचे बिल लाखोच्या घरात येत आहे. सौर ऊर्जा प्रकल्प बसवूनही दोन वर्षात चालू न केल्याने वीस ते पंचवीस लाख रुपये वीज बिलपोटी खर्च झालेला आहे. याबाबत जिल्हा परिषदेच्या बांधकाम विभागासोबत संपर्क साधला असता, त्यांच्याकडून मेढा मार्फत यंत्रणा बसवलेली आहे याव्यतिरिक्त इतर माहिती उपलब्ध झाली नाही.
