अलिबाग : रायगड जिल्ह्यातील १० नगरपरिषदांमध्य निवडणूक प्रक्रिया सुरू आहे. निवडणुकीसाठी नामनिर्देशनपत्र मागे घेण्याची मुदत शुक्रवारी (दि.२१) पर्यंत होती. या मुदतीत जिल्ह्यातील १०७ उमेदवारांनी आपले नामनिर्देशन पत्र मागे घेतले आहे. यामुळे आता नगरपरिषद निवडणुकीत ६०९ उमेदवार निवडणुकीच्या रिंगणात आहेत.

जिल्ह्यातील एकूण १० नगरपरिषदांमध्ये नगराध्यक्ष पदासह २१७ नगरसेवक पदांसाठी निवडणुका होत आहेत. नगरपरिषद निवडणुकीसाठी १० नोव्हेंबर ते १७ नोव्हेंबर दरम्यान नामनिर्देशन पत्र स्वीकारण्यात आली. या नामनिर्देशन पत्रांची छाननी १८ नोव्हेंबर रोजी करण्यात आली तर नामनिर्देशन पत्र मागे घेण्याची मुदत शुक्रवारी (दि.२१) रोजी संपली. 

या नामनिर्देशन पत्र मागे घेण्याच्या मुदतीत नगराध्यक्ष पदाच्या ९ तर नगरसेवक पदाच्या ९८ उमेदवारांनी आपले नामनिर्देशन पत्रा मागे घेतले. यामुळे आता नगरसेवक पदासाठी ५७५ तर नगराध्यक्ष पदासाठी ३४ असे ६०९ उमेदवार निवडणुकीच्या रिंगणात आहेत.

जिल्ह्यातील राजकीय हालचालींना यामुळे वेग आला आहे. उमेदवारी अर्ज दाखल केल्यानंतर सर्वच प्रमुख उमेदवारांनी आपला प्रचार सुरू केला आहे. उमेदवार प्रमुख कार्यकर्त्यांच्या भेटी घेण्यासोबत, मतदारांच्या घरोघरी जाऊन संपर्क साधत असल्याचे चित्र दिसून येत आहे.

नगरपरिषद : नगराध्यक्ष पदाचे उमेदवार : नगरसेवक पदाचे उमेदवार

खोपोली : ७ : ११८

अलिबाग : २ : ४२

श्रीवर्धन : ४ : ६०

मुरुड : ३ : ५८

रोहा : २ : ५१

महाड : ५ : ५३

पेण : ३ : ५२

उरण : ४ : ४९

कर्जत : २ : ४६

माथेरान : २ : ४६