अलिबाग : रायगड जिल्ह्यातील १० नगरपरिषदांमध्ये निवडणूक प्रक्रिया सुरू आहे. नगरपरिषद निवडणुकीत नगरसेवक पदासाठी ९०० तर नगराध्यक्ष पदासाठी ६३ नामनिर्देशन पत्र दाखल झाले होते. या नामनिर्देशन पत्रांच्या छाननीत नगरसेवक पदाच्या १६५ तर नगराध्यक्ष पदाचे १७ नामनिर्देशन पत्र अपात्र ठरविण्यात आले. यामुळे आता नगरपरिषद निवडणुकीत ७८१ उमेदवार निवडणुकीच्या रिंगणात आहेत.

जिल्ह्यातील एकूण १० नगरपरिषदांमध्ये नगराध्यक्ष पदासह २१७ नगरसेवक पदांसाठी निवडणुका होत आहेत. नगरपरिषद निवडणुकीसाठी १० नोव्हेंबर ते १७ नोव्हेंबर दरम्यान नामनिर्देशन पत्र स्वीकारण्यात आली. या मुदतीत नगरसेवक पदासाठी ९०० तर नगराध्यक्ष पदासाठी ६३ नामनिर्देशन पत्र दाखल झाले होते. 

या नामनिर्देशन पत्रांची छाननी १८ नोव्हेंबर रोजी करण्यात आली. छाननीत नगरसेवक पदाच्या १६५ तर नगराध्यक्ष पदाचे १७ नामनिर्देशनपत्र अपात्र ठरविण्यात आले. त्यामुळे आता नगरसेवक पदासाठी ७३५ तर नगराध्यक्ष पदासाठी ४६ असे ७८१ उमेदवार निवडणुकीच्या रिंगणात आहेत.

जिल्ह्यातील राजकीय हालचालींना यामुळे वेग आला आहे. उमेदवारी अर्ज दाखल केल्यानंतर सर्वच प्रमुख उमेदवारांनी आपला प्रचार सुरू केला आहे. उमेदवार प्रमुख कार्यकर्त्यांच्या भेटी घेण्यासोबत, मतदारांच्या घरोघरी जाऊन संपर्क साधत असल्याचे चित्र दिसून येत आहे.

नगरपरिषद : नगराध्यक्ष पदाचे उमेदवार : नगरसेवक पदाचे उमेदवार

खोपोली : ८ : १६९

अलिबाग : ५ : ६४

श्रीवर्धन : ४ : ६२

मुरुड : ४ : ६२

रोहा : ३ : ६१

महाड : ५ : ५०

पेण : ४ : ८७

उरण : ५ : ५३

कर्जत : ५ : ५८

माथेरान : ३ : ६०