अलिबाग : अलिबाग नगरपरिषद निवडणुकीत शेकाप, काँग्रेस आघाडीच्या उमेदवार अक्षया नाईक यांना महाराष्ट्र नवनिर्माण सेनेने जाहीर पाठिंबा दिला आहे. पक्षाचे उपजिल्हाध्यक्ष शैलेश खोत व अलिबाग तालुकाध्यक्ष सिद्धू म्हात्रे यांच्या उपस्थितीत अलिबाग शहरातील अलिबाग गड या पक्षाच्या कार्यालयात अक्षया नाईक यांचा सत्कार करीत, मनसेचे कार्यकर्ते नाईक यांना भरघोस मतांनी विजयी करण्यासाठी सर्वोतोपरी सहकार्य करतील असे आश्वासन दिली. यावेळी अक्षया नाईक आपण अलिबागच्या विकासासाठी इपण कटिबद्ध असल्याची ग्वाही दिली.
अलिबाग नगरपरिषद निवडणुकीची रणधुमाळी सुरू असून, २ डिसेंबर रोजी मतदान प्रक्रिया राबविण्यात येणार आहे. या निवडणुकीत शेकाप, काँग्रेस आघाडीकडून थेट नगराध्यक्ष पदासाठी शेकापच्या अक्षया नाईक या निवडणुकीच्या रिंगणात नशीब अजमावत आहेत. अक्षया नाईक यांनी आपला प्रचार धडाक्यात सुरू केला असून, त्यांना शहरात उत्स्फूर्त प्रतिसाद लाभत आहे.
बुधवारी अक्षया नाईक यांनी महाराष्ट्र नवनिर्माण सेनेच्या अलिबाग कार्यालयाला भेट दिली. यावेळी मनसेतर्फे त्यांचे पुष्पगुच्छ देऊन स्वागत करण्यात आले. तसेच पक्षाचे उपजिल्हाध्यक्ष शैलेश खोत व अलिबाग तालुकाध्यक्ष सिद्धू म्हात्रे यांनी अक्षया नाईक यांना मनसेतर्फे पाठिंबा जाहीर केला. यावेळी पक्षाचे अलिबाग चिटणीस विनायक पालेकर, माजी तालुकाध्यक्ष मुरलीधर पाटील, अमित कंटक, शेकापचे प्रदीप नाईक यांच्यासह मनसेचे कार्यकर्ते मोठ्या संख्येने उपस्थित होते.
